Netbrynja – Fræðsla í netöryggi fyrir börn og unglinga: Hvar stöndum við og hvert stefnum við?

Í síðustu viku fengum við hjá SecureIT tækifæri til að kynna Netbrynju á viðburði á vegum Rannís og Eyvör NCC-IS. Þar deildum við fyrstu útgáfu verkefnisins og fengum dýrmæt viðbrögð og umræðu um mikilvægi aukinnar fræðslu í netöryggi barna og unglinga. Hér deilum við uppfærslu á stöðu verkefnisins, hvað við höfum lært og hvert við stefnum næst.

Hvað er Netbrynja?

Netbrynja er nýr stafrænn fræðsluvettvangur sem hjálpar börnum á aldrinum 8–15 ára að þekkja og forðast netógnir og skilja afleiðingar t.d. Neteineltis. Lausnin byggir á gagnvirku efni og spjallmenni sem gerir börnum og unglingum kleift að læra á sínum hraða og á þeim miðlum og tækjum sem þau þekkja og nota daglega.

Við hönnun Netbrynju höfum við jafnframt haft að leiðarljósi að styðja við kennara og foreldra í fræðslu og samtali um örugga netnotkun og stafrænt sjálfsöryggi barna.

Hvað höfum við gert hingað til?

Við höfum smíðað frumgerð með spjallmenni og myndbandsefni.
Fengið virka þátttöku kennara og sálfræðinga við þróun efnis.
Skipt yfir í notkun gervigreindartóla til að framleiða myndbandsefni hraðar og á hagkvæmari hátt.
Tekið upp friðhelgi einkalífs nálgun (e. privacy-first) nálgun þar sem öll gagnasöfnun er lágmörkuð og ópersónugerð og engin utanaðkomandi þjónusta er notuð.

Hvað höfum við lært?

Beint framlag frá fagfólki, kennurum og sálfræðingum er ómetanlegt við að móta efni sem virkar fyrir börn og unglinga.
Að byggja tæknilega skalanlega lausn er áskorun en að búa til efni sem börn vilja í raun nota er önnur, jafnvel stærri!
Mikilvægt er að hönnun og upplifun taki mið af aldri, forsendum og hegðun barna og unglinga í stafrænni notkun og veröld.

Hvert stefnum við næst?

Prófanir á Netbrynju í grunnskólum hefjast vonandi haustið 2025.
Við vinnum að því að bæta við efni um neteinelti, stafræna samskiptahæfni og sjálfsöryggi á netinu.
Við sækjum eftir frekara samstarfi við menntasamfélagið, fræðsluaðila og stofnanir sem sinna velferð barna og unglinga í stafrænum heimi.

Takk fyrir traustið

Við erum afar þakklát fyrir styrkinn frá Eyvör NCC-IS netöryggissjóðnum í gegnum Rannís, sem hluta af Digital Europe áætlun Evrópusambandsins. Þessi stuðningur gerir okkur kleift að þróa lausnir sem efla netöryggismenningu frá unga aldri og styðja næstu kynslóð í að verða öruggari og meðvitaðri notendur stafrænnar tækni.